Os erros bravos de #Aritmética20N

by xabier

A falla de transparencia dos cálculos feitos pola xente que estea detrás de #Aritmética20N dificulta moito saber onde estivo o erro nas súas contas. Pero as súas previsións con respecto ás eleccións españolas do 20 de novembro de 2011, e en concreto, con respecto aos datos galegos, son clamorosamente erradas. Vou tentar expoñer os datos correctos seguindo a súa lóxica do que é o voto útil. A súa lóxica non coincide coa miña, pero iso agora é irrelevante.

Os votos por escano

Primeiro cálculo mal feito. Este cálculo parte de que todos os escanos custan os mesmos votos dentro da mesma provincia, pero iso non é así. Se nunha provincia un partido A obtén 100.000 votos e 1 escano, o seu escano vale 100.000. Pero se polos resultados das outras forzas, voto arriba voto abaixo, en vez de corresponderlle 1 escano lle corresponden 2, o seu escano vale 50.000 (é dicir, xusto a metade). Iso quere dicir que o valor de escano é igual ao número de votos conseguido por cada formación, dividido polo número de escanos atribuídos a eses votos.

Pódese calcular, iso si, o número de votos que valeu o último escano nunha elección determinada. Ou sexa, os votos que lle custou ao partido que levou o último escano repartido conseguir ese escano.

Por exemplo, e con respecto a Galicia, #A20N di que os prezos por escano son 52.498 (C), 35.207 (L), 33.982 (O), e 60.051 (P). Esas cantidades non se sabe moi ben de onde veñen, pero en calquera caso son falsas, inventadas ou, como pouco, enganosas. Os últimos escanos de Galicia repartíronse en 2008 con estas cantidades: 79.172 (C), 51.346 (L), 47.157 (O) e 70.735 (P). Ou sexa, entre 10.000 e 25.000 votos máis do que di #A20N. Un erro moi considerable para o que estamos valorando, e que é aínda maior proporcionalmente nas provincias interiores.

Os votos que se necesitan para conseguir escano

Sempre baséandonos nos resultados de 2008, do que trata a táboa de #A20N é aconsellar cal é o mellor partido para votar que non sexa PP-PSOE e co fin de que obteña escano. #A20N sinala que, en Galicia, sempre por esta orde, BNG e despois EU. Porén, esquece que o BNG xa ten escano en dúas provincias, feito que distorsiona completamente os cálculos. Pero vaiamos provincia a provincia.

A Coruña

Segundo #A20N, o BNG necesitaría apenas 2000 votos para obter un segundo escano. Iso é completamente falso. Con respecto aos resultados de 2008 BNG necesitaría uns 69.514 votos máis (33 veces máis do que di #A20N) para arrebatarlle un novo escano ao PP. EU, pola súa banda, necesitaría 67.503 máis para conseguir entrar no reparto. Xa que logo, se désemos por consolidado o escano do BNG, a mellor opción de #A20N tería que ser EU e non BNG.

Aí non mencionamos que EU tería que medrar un 600% para obter ese escano, nin que o BNG tería que obter 153.000 votos, aos niveis do seu máximo histórico das autonómicas de 1997, para conseguir o seu segundo. De feito, tamén obviamos que BNG e EU pelexarían por ese escano, co cal en realidade o prezo sería bastante maior.

Outra cousa que tamén obviamos é que as enquisas prevén que o PP obteña unha maior porcentaxe de votos. Iso significa que para o PP, nestas circunscricións atlánticas, vai ser aínda máis sinxelo obter deputados ca para o resto dos partidos. Por exemplo, e sempre segundo os resultados das eleccións de 2008, o PP necesitaría o moi improbable 60% dos votos para quitarlle o escano ao BNG, sempre que o BNG se mantivese na porcentaxe de votos daquel ano. Pero se o BNG perdese unicamente un 2% dos votos totais para o PP sería máis sinxelo, e só necesitaría o 50% dos votos para quitarlle o escano ao BNG, algo que ten ao alcance da man. Isto é, iso si, sempre que o PSOE mantivese a súa representación e os seus votos.

Pontevedra

Os cálculos pontevedreses son bastante semellantes aos coruñeses. O BNG necesitaría 95.322 votos máis ca en 2008 para sonseguir o seu segundo escano. Isto é, bastante máis ca dobrar os votos conseguidos en 2008. De feito, suporía conseguir o seu máximo histórico en calquera elección ata a data. EU necesitaría 73.405 votos, é dicir, multiplicar os seus de 2008 por 8, aproximadamente, para obter un escano. En realidade, aínda que poida parecer estraño, é máis sinxelo para EU obter ese escano que para o BNG, en parte porque EU llo quitaría ao BNG.

O interese pontevedrés, máis có coruñés, é saber se o BNG vai ser capaz de reter o seu escano, algo altamente improbable. Perderíao se o PP medrase unicamente un 1%, e un dos escenarios viables onde o mantería é se milagrosamente o PP non medrase por riba do 50%, pero se ao mesmo tempo o PSOE caese por baixo do 30% (é dicir, nun escenario de medre xeneralizado doutras opcións, sexan UPyD, EU, C21 ou quen for).

Lugo e Ourense

As provincias interiores son moi sinxelas porque é practicamente imposible que ningún partido fóra do PP ou do PSOE obteña escano nestas circunscricións. Unicamente Coalición Galega obtivo unha vez un deputado por Ourense, pero daquela a provincia escollía 5 deputados, non 4 como agora.

En Lugo, e tomando como referencia os resultados de 2008, un partido ten que conseguir máis do 20% dos votos para poder obter escano. Iso non o conseguiu o BNG nin nas autonómicas de 1997 (o seu máximo histórico), cando non pasou do 18.8%. O BNG tería que dobrar os seus resultados de 2008, por exemplo, (24.603 votos, e non 3.667 como inventa #A20N). EU tería que ter 48.989 votos, é dicir, un 2400% máis do que tivo en 2008. É máis, nin sequera se se unisen todos os votos de todos os partidos que non foron PP e PSOE (e que en 2008 incluían dende Falange ou AN ata BNG ou PCPE) quedarían preto dese cuarto escano (a un 5% del).

Ourense é moi semellante a Lugo. O BNG tería que aumentar 20.922 votos (preto de dobrar os seus resultados), algo máis dos que obtivo naqueles históricos comicios autonómicos de 1997. EU tería que obter 45.500 votos en Ourense (un 2800% máis). Da mesma maneira, nin sequera uníndose todos os partidos que non foron PP e PSOE estarían preto de obteren o cuarto escano por Ourense.

En resumo

Se votas na Coruña ou en Pontevedra, pode ter interese para ti que o BNG reteña os resultados acadados en 2008, pero nunca poderá aumentalos. Se votas en Lugo ou en Ourense, o teu voto, se non é para PP ou PSOE, é divertida, libre e gozosamente inútil.

Disclaimer

Son membro do partido Converxencia 21. Non fago isto como propaganda desta formación, senón para que non se manipule o concepto de voto útil. Que cadaquén vote o que lle pareza.